أحافظ على صاحبي / صاحبتي ازاي

أحافظ على صاحبي / صاحبتي ازاي



صدق إحساسك، لو إحساسك حذرك من حاجات في الآخر ؟

الأصدقاء شيء مهم جداً لحياتنا، أصدقائنا هم في الغالب ناس بنثق فيهم ونحترمهم وزي أي علاقة فعلاقة الصداقة محتاجة مجهود من الناحيتين وتغيير اتجاه الصداقة عادي زي ما ساعات تغيير الأصدقاء عادي .

الاحتفاظ بالصداقة بيبقى في أوقات شيء صعب وساعات الأصدقاء بيحبطونا أو بيخونونا ودا شيء بيجرح وبيتعب جداً عشان كدا ساعات الواحد بيبقى مش عارف يختار مين يبقى صديقه .

اكتب لسته فيها أيه الحاجات اللي نفسك تكون موجوده في صديقك / صديقتك .

صدق إحساسك، لو إحساسك حذرك من حاجات في الآخر ؟ طب لو حصل بيننا مجادلات نعمل أيه ؟



طبيعي في الصداقة إننا نشارك إرادتنا مع بعض وعادي لو اختلفنا مع بعض أو حتى شدينا، ممكن تحس إنك مجروح، محبط، زعلان، حزين أو وحيد لما تتناقش جامد مع أصدقائك والأحاسيس دي ممكن تخلي المناقشة المنطقية صعبة .

تصفية المشاكل بطريقة كويسة هيخلي علاقتكم وصداقتكم أقوى عشان كدا حاول / حاولي عشان :

- الرغبة إننا نفضل أصحاب دا يخلينا نقبل اختلافات بعض . هل الصداقة معناها إننا عمرنا ما هنختلف ؟ طبعاً لأ . لكن فهمنا لبعض وقبولنا لبعض هيخلينا نتفق إن مفيهاش حاجة لو اختلفنا في الرأي وإن دا مش هيهدم صداقتنا .

- اتكلم / اتكلمي مع صديقك / صديقتك . مهم إن الطرف التاني يعرف مشاعرك تجاه الأمر اللي مضايقك لما مش بنعلن عن اللي مضايقنا، الغضب اللي جوانا بيزيد . المهم إنك تختار الوقت اللي انتوا الاتنين فيه تكونوا هاديين فيه يعني مش وسط النرفزة والشد .

ممكن أكتب جواب حتى لنفسي عشان أحدد أفكاري وأيه اللي مضايقني بالضبط قبل ما أواجه صديقي، ممكن أتكلم مع القائد بتاعي في الاجتماع أو الكنيسة عشان يساعدني أواجه الصديق بطريقة بناءة متهدش الصداقة وفي الحالة دي شارك القائد بأحاسيسك واللي جواك أكتر من اللي عمله صاحبك أو قاله .

- اسمع صديقك / صديقتك . اسمع اللي هيقوله والسبب اللي خلاه يعمل أو يقول الحاجة اللي زعلتك، اديلة فرصة يخلص كلامة من غير ما تقاطعة ولا تدينة .

- اتفادى إنك تلومه، طبيعي الواحد لما بيكون زعلان أو متضايق إنه بيبقى عايز يرمي اللوم على حد لكن دا بيخلي الموقف أصعب . عشان كدا ركز على مشاعرك يعني مثلاً قول "أنا صعبان عليا منك عشان قلت .. " أو "أنا حسيت إنك مش مهتم بيا لما قلت .. " .

- إنهاء صداقة . ساعات اهتماماتنا بتتغير مع الوقت وتلاقي إن الحاجات اللي كانت بتجمعك مع الصديق / الصديقة وبتقربكم من بعض مبقتش موجودة، ساعات دا يستدعي إنهاء الصداقة .

لما بنهي صداقة بيبقى لازم أسيب الشلة ودا ممكن يخليك / يخليكي تحس بوحدة فظيعة وممكن تاخد وقت على ما تلاقي أصدقاء جداد .

حاول تشارك مع صديق آخر أو مع حد من أهلك أو قائد اجتماعك . افتكر إن الحياة مراحل ولو بصيت لورا هتلاقي إن كان عندك أصحاب وشخصيات كانت قريبة جداً منك لكن دلوقتي اختفت . دا طبيعي لأن الحياة عبارة عن مراحل .

بس الصديق الوحيد اللي مش بيتغير وبيفهم كل احتياجاتنا في المراحل كلها هو الرب يسوع .