صديقاتى ليت كل البشر انتى

"كل واحده ، وأنتيمتها
كل واحده وليها واحده
زيها و تشبه صورتها ،،
فولة واتقسمت روحين
قلب ينادوله بإسمين
يفضفضوا لبعض ف ساعات
في كلام بنات
و ينموا طول الليل علي الواد اللي عاكس واحده فيهم
يجيبوا سيرة ناس كتير
يهزروا ، يضحكوا نفسيهم
و يقفشوا من بعض شوية ، ، كأنهم "ضرة" بعضيهم !
وياخدوا بعض بالحضن لما
بالصدفه تتقابل عنيهم !
مجانين اوي ،،
اللبس واحد .. والطبع واحد
وبرغم ذلك الإختلاف في حاجات كتيرة!
لو واحدة فيهم عنيها خضرة ،
التانية أه تنتابها غيرة!
لكن تخبي،
وف أي موقف مالوهش لازمة .. بتبان غيرتها
وبرغم ذلك ، حنينين علي بعض جدآ
وكل بنت صاحبتها ليها كما "مرايتها"
ودي سابت موبايلها معاها
ودي نسيت عندها شنطتها
متلخبطين ، ما هي فولة ومقسومة روحين
ع الدنيا أصلآ متفقين
ولما واحدة بتغيب شوية ،
التانية هي ترد غيبتها
ولما واحدة تكون مخنوقة
التانية بتكونلها ضحكتها
ولما واحدة بتحب .. فورآ
التانية تقرصها ف ركبتها
"حواديت بنات .. أبطالها هما"
وكأنهم أم وطفلتها
و يكون ف عونك ياللي هتدخل .. في يوم ما بين بنت و صاحبتها
"الأنتيمات .. دول حاجة واحدة: وكل واحدة .. وأنتيمتها