كيكة صيامى

كل سنة وانتم طيبين

كيكة صيامى جميلة وهشة ومش ناشفة خالص ومتخافوش مجربها
دى مقادير صينية صغيرة لو عملتى صينية كبيرة ضاعفى المقادير



المقادير

2 كوب دقيق
1كوب سكر او اقل حسب الرغبة
1 وربع كوب عصير تانج مدوب فى ميه
فانيليا او بشر برتقال
6 معالق كبيرة زيت او سمن نباتى على حسب الرغبة
باكو بيكنج بودر
2معلقة كبيرة خل او معلقة محسن خبز


الطريقة

الاول سخنى الفرن

وبعدين هتحطى الزيت مع السكر والخل والفانيليا وبشر البرتقال والعصير فى الخلاط

وهتنخلى الدقيق والبودر مرتين

هتصبى الخليط فى طبق وتضيفي عليه الدقيق بالتدريج لحد ما يخلص المقدار
و تصبيه فى صينية مبطنة سمنة ودقيق

وعلى الفرن جرى فى الرف الوسطانى ومتفتحيش قبل 25 دقيقة

ولما تستوى خليها تهدى شوية فى الفرن متقطعيهاش على طول

وبعدين قطعيها حلوة قوى اللى هياكلها مش هيعرف يفرقها عن العادية وكمان هشة وخفيفة

ومتقلقيش خالص من الخل لان هو ده اللى هيتفاعل مع البودر علشان يعلى الكيك بدل البيض وطعمه مش بيبان خالص