النيابة تتهم المكوجي وشقيقه ووالده بإلقاء المولوتوف على «معاذ» بأحداث دهشور
حصلت «المصرى اليوم» على نص تحقيقات النيابة العامة فى حادث دهشور الذى راح ضحيته شاب بسبب احتراق قميص، وتطور إلى فتنة طائفية، وواجهت النيابة المكوجى سامح سامى يوسف وشقيقه وائل ووالدهما باتهامهم بالشروع فى قتل الضحية معاذ محمد أحمد – قبل وفاته - وذلك بإلقاء زجاجات المولوتوف عليه، أثناء مروره فى الشارع، وأنكر المتهمون الثلاثة التهمة الموجهة إليهم، واستمعت النيابة إلى أقوالهم حول إحراق منزلهم والاعتداء عليهم وإحداث إصابات بهم، وأكدوا أن أحمد وعماد وعلى وسيد رمضان، هاجموهم بالسنج والأسياخ الحديدية والأسلحة البيضاء، وأشعلوا النيران فى المنزل.
وسألت النيابة المتهم الأول:
? ما اسمك؟
ـ وائل سامى يوسف - عامل بمغسلة.
? أنت متهم بالشروع فى قتل المجنى عليه معاذ محمد أحمد.
ـ محصلش واللى حصل إن هناك مشكلة حصلت بينى وبين أحمد رمضان يوم الأربعاء اللى فات وبعدها فوجئت فى الساعة 3 بعد العصر بكل من أحمد رمضان، وعماد رمضان، وعلى رمضان، وسيد رمضان، معاهم سنج وشوم وهجموا على أنا وأخويا سامح وأبويا وابن عمى واعتدوا علينا بالضرب.
? أنت قمت بإلقاء المولوتوف على المنازل بعد المشاجرة.
ـ الكلام ده محصلش لأننا مضربناش حد.
? ما قولك فيما قرره معاذ أحمد، يتهمك فيه أنت وسامح سامى، وسامى يوسف، ويوسف عادل، بإلقاء زجاجات المولوتوف من أعلى منزلك؟
ـ الكلام ده محصلش.
? ما العلاقة بينك وبين المجنى عليه معاذ محمد أحمد؟
ـ لا يوجد بيننا أى علاقات.
? أنت متهم بالشروع بقتل المجنى عليه معاذ؟
ـ محصلش
? ما هى تفصيلات حدوث إصابتك؟
ـ اللى حصل إن على رمضان سيد، وأحمد رمضان سيد، وعماد رمضان سيد، وسيد رمضان سيد، ورمضان سيد طاهر، هما اللى ضربونى بالسنج والمطاوى علشان كان هناك خلاف بينى وبين أحمد.
? من تحديدا الذى أشعل النيران فى المنزل؟
ـ أحمد رمضان سيد طاهر، وعلى رمضان سيد، وسيد رمضان ورمضان سيد.
? وكيف تمكن المتهمون من إشعال النيران فى المنزل؟
ـ هما هجموا علينا وإحنا قاعدين فى المحل وراحوا ولعوا فى البيت.
? ما قيمة التلفيات؟
ـ حوالى مائة ألف جنيه وسرقوا ذهباً بحوالى ستة وعشرين ألف جنيه.
? وما قصد المتهمين من ارتكاب تلك الأفعال؟
ـ قصدهم يقتلونا ويمشونا من البلد.
وسألت النيابة المتهم الثالث:
? ما اسمك؟
ـ اسمى سامح سامى يوسف مكوجى.
? ما قولك فيما هو منسوب إليك بالشروع فى قتل معاذ محمد أحمد؟
ـ محصلش
? ما الذى حدث وما ظروف ضبطك وإحضارك؟
ـ اللى حصل إن مشكلة حصلت يوم الأربعاء بين أخويا وبين محمد رمضان وبعدين فوجئنا فى الساعة 3 العصر بكل من أحمد رمضان، وعماد رمضان، وعلى رمضان، وسيد رمضان، ومعاهم سنج وشوم واتهجموا على البيت وتعدوا بالضرب على أبويا وحرقوا المحل والبيت.
? ما قولك فيما هو منسوب إليك بإلقاء زجاجات مولوتوف على المجنى عليه معاذ محمد مما أدى إلى إصابته بحروق والذى تصادف مروره بالشارع مما أثار حفيظة الأهالى وقاموا بحرق المنزل؟
ـ لا، الكلام ده محصلش إحنا مضربناش حد.
? هل بينك وبين المجنى عليه معاذ أحمد أى خلافات؟
ـ لا يوجد بينا أى حاجة.
? إنت متهم بالشروع فى قتل المجنى عليه معاذ محمد؟
ـ محصلش.
وسألت النيابة المتهم الثالث سامى يوسف نسيم عوض الله «55 سنة، ترزى»:
? ما قولك فيما هو منسوب إليك بالشروع فى قتل المجنى عليه معاذ محمد أحمد؟
ـ محصلش.
? ما الذى حدث؟ وما ظروف الواقعة؟
ـ اللى حصل إنى كنت موجود فى البيت أنا وأولادى ولقينا ناس دخلوا علينا البيت ومعاهم شوم وكسروا البيت وإحنا جرينا ولقيناهم ولعوا فى البيت كله.
? ما قولك فيما قرره المجنى عليه معاذ محمد بأنه أثناء مروره أسفل منزلكم قمت بإلقاء المولوتوف عليه من أعلى المنزل؟
ـ محصلش.
? أنت متهم بالشروع فى قتل المجنى عليه معاذ محمد؟
ـ محصلش.
? ما أسباب إصابتك؟
ـ أنا كنت قاعد داخل بيتى أنا وأولادى ولقيت الناس هجموا على البيت وكان معاهم عصى وشوم وضربونا بسبب مشكلة كانت حصلت يوم الأربعاء الماضى بين سامح ابنى وبين أحمد رمضان بسبب المكواة وضربونى بسيخ حديد.
? كيف تمكن المتهمون من إشعال النيران بمنزلك؟
ـ هما هجموا علينا فى المحل وطلعنا من المحل للبيت وراحوا ولعوا فى البيت.
موضوع: النيابة تتهم المكوجي وشقيقه ووالده بإلقاء المولوتوف على «معاذ» بأحداث دهشور 
الأربعاء أغسطس 08, 2012 10:15 pm
