اصاحب عكازى

نازل من علي باب الشقة
اتكعبلت في قشرة موز
اتدحرجت السلم كله
واتكسرت كحبة لوز
قايم بتألم من وجعي
بتنطط زي الأراجوز
بصرخ جامد ماسك رجلي
وبقيت زي متسابق عاجز
خاسر مش طمعان في الفوز
رحت لصاحبي عشان يسندني
قالي بجد انا عندي ميعاد
كله بيتهرب يساعدني
حتي خطيبتي الهبله سعاد
رحت موقف توك توك ليا
قولتله علي اقرب مستشفي
بس بلاش تستنضف يعني
لجل الحالة صعبة وناشفة
قالي ياباشا طلبك عندي
قولتله مبسوط انك دوغري
راح خدني بسرعة ووداني
لطبيب فاتح تحت الكوبري
كاتب فوق كرسيه بالاحمر
السمكري لصيانة العضم
اتخضيت مالمنظر اصلا
زاد جوايا الخوف واللطم
الدكتور قال اهدى شوية
هنردها عل بارد ليك
قولتله كتر خيرك لكن
جبسهالي وراح اراضيك
في الاول شمرلي اللبس
بعدها قام طهرها بجاز
ونقعهالي في مايه بجبس
وقال مبروك تم الإنجاز
بعدها قالي اتسند فورا
علي حد يكون صاحب ليك
قولتله كل اصحابي باعوني
شوف حاجه تانيه الله يخليك
قام قال ليا بكل إيجاز
لو عايز تاخد بنصيحتي
لازم تشتري ليك عكاز
شهر ونص انا ماسك فيه
نازل طالع دايما بيه
بالرغم انه يادوبك خشبه
احساس الحنيه ماليه
وف وسط شعوري بإعجازي
وف ظل الإحساس القاسي
والغربة اللي شايفها في ناسي
قررت اصاحب عكازي

مايكل سامي